：醫生呀，我覺得我妹妹呢排情況唔係太好，成日都好似好唔開心咁，食唔落飯，瞓唔好覺，成個人都冇晒精神
：吓？佢咩事呀？
：我懷疑佢有情緒病，想叫佢去睇醫生，但佢唔肯⋯⋯點算呀？
：咁呀⋯⋯首先你知唔知佢呢排係咪遇到咩困難啊？
：我大概知少少，佢工作方面唔係太順利，近牌拍拖又啱啱好分咗手，但佢冇同我講太多，詳細情況我唔係好知⋯⋯
：咁睇嚟佢都遇到唔少困難喎，唔怪得知心情唔好。點解佢唔想睇醫生啊？
：佢堅持話自己無病，休息一排就會好。但係佢呢個情況已經持續左三個月la，都冇好轉⋯⋯
：唉，其實睇醫生都冇得逼㗎，佢一個成年人，真係唔想去嘅話有時都冇辦法⋯⋯佢依家又未到好緊急嘅情況，你又唔可以綁佢去醫院，係咪？
：咁又係……咁我係咪咩都做唔到啊？
：或者你可以首先了解多d佢嘅情況，睇下佢願唔願意同你傾佢遇到ge煩惱？
：如果佢唔肯講點算呀？
：如果佢暫時唔想講ge話，你唔使俾壓力佢，可以話俾佢知你隨時都喺度，如果佢需要幫助，隨時都可以黎搵你
：唉，我依家對佢嘅情況了解唔深，我都幾驚佢會出事⋯⋯
：你平時可以多d關心佢呀，留意下佢嘅情況，仲可以試下帶佢出去食飯、出去玩，睇吓可唔可以令佢開心d！如果佢知道有個人一直喺身邊support佢，相信對佢已經係好大安慰㗎啦
：好，我明白la～
：等佢完全信任你嘅時候，你先至慢慢同佢分析，建議佢去搵醫生幫手囉，可能嗰陣時講會令佢易d接受！
：咁又係……或者我可以叫媽媽同佢傾吓？佢平時同媽媽嘅關係都幾好，可能佢會比較聽媽媽話
：都可以啊！但如果情況突然變差，令你覺得佢真係有危險，記住要快d求助啊！
：ok ok！
====================
文章來源：香港精神康復者聯盟
香港精神康復者聯盟 (AEMIHK) 成立於 1999 年，為註冊的非牟利慈善團體。多年來一直致力於服務精神病康復者和家屬，促進他們自助互助， 推動康復者積極參與有關精神健康的活動及社會事務。
(Visited 2 times, 1 visits today)
