護士術語你識幾多？邊個要「吞屎」

護士大家見得多，但護士之間的術語你又知幾多？咩叫「得手」？邊個係「吞屎」？醫院點解會有「阿爺」？下面同大家逐一拆解

1. 吞屎
所謂「吞屎」（TUNS）其實是Temporary Undergraduate Nursing Students（學護臨時職位），就讀護士課程的學生，可以申請到公立醫院工作，一方面吸收經驗，另一方面緩解護士人手不足情況。

2. 得手
「有無人得手啊？」其實是指「有無人得閒？」，因為病房一般避忌「講過頭」話得閒，一話得閒就會突然工作繁忙，所以用「得手」代替「得閒」。

3. 阿爺
病房中的「阿爺」不一定年紀大，是指資深護師（Advanced Practive Nurse，APN)，一般能夠做到APN都需要一定年資，經驗豐富，所以被尊稱「阿爺」。

4. 阿打
「阿打」其實即是Sister，「輩份」其實同「阿爺」一樣，都是APN，不過「阿打」是女，「阿爺」是男。一般在病房中見到有披肩的就是「阿打」，但新一代「阿打」嫌披肩老土又唔方便，已經好少著。

5. 街主
每位護士都有機會做「街主」，即是病房某區域的負責護士，由跟醫生巡房、睇排板、做醫療程序，甚至解答家屬問題，都會由「街主」負責。

6. Runner
「Runner」由不用「入街」的護士擔任，主要輔助「街主」，例如幫手量血壓、心跳等。

7. Round片
「Round片」其實即是「換尿片」，病房有指定換片時間，全場一齊換。同去酒吧叫「呢Round我嘅」道理一樣，只係變成尿片。